港英板私隱政策
草稿版本 · 最後更新 2026-09-25
草稿呢份係範本，方括號入面嘅資料要填返。正式開站前，請搵律師或者跟 ICO（英國資訊專員辦公室）嘅指引覆核一次。
其他國家呢份政策原本係為港英板（英國）而寫。港日板、港台板、港星板、港加板、港澳洲板用戶喺當地使用時，當地嘅私隱法律亦都適用。我哋正喺覆核呢份政策點樣配合各地法律，更新之後會喺「管理員公告」通知。
港英板（下稱「我哋」）係一個俾喺英國生活嘅香港人用嘅分類留言板。呢份政策講解我哋收集咩個人資料、點解收集、儲幾耐，同埋你有咩權利。我哋跟從英國《UK GDPR》同《2018 年資料保護法》。
1. 邊個負責你嘅資料
資料控制者：［營運者姓名或公司名］，地址：［英國通訊地址］。有任何私隱問題，請 email：info@hkerboard.com。
2. 我哋收集咩資料
- 你發佈嘅內容：帖文標題、內容、價錢、地區、顯示名稱。呢啲會公開顯示。
- Email 地址：發帖嘅驗證（生活問答同著數除外），轉寄「聯絡發帖人」訊息，同埋要求刪除時嘅聯絡。永遠唔會公開（除非你自己喺帖入面填「公開聯絡方法」）。
- 聯絡發帖人：要先用 email 登入。你嘅登入 email、稱呼同訊息，會用 email 轉寄俾發帖人（發帖人會睇到你嘅 email，方便佢回覆）。我哋唔會儲存訊息內容，只會記錄你嘅 email、IP 同邊個帖，用嚟防止濫用。寄俾發帖人嘅 email 會附上當時帖文內容嘅副本，你嘅登入 email 亦會收到同一份副本（連埋你寫嘅訊息），方便雙方日後對返。
- IP 地址同裝置資料：每次發帖、改帖、聯絡發帖人、舉報或者提交刪除要求時，我哋會記錄你嘅 IP 地址、時間同瀏覽器類型。
- 生活問答回覆：回覆（包括你填嘅名）會公開俾所有人睇到，唔使登記或者 email。同發帖一樣，我哋會記錄回覆嘅 IP 地址同時間，保存方法見下面第 4 節。
- 相片：「二手・放售」帖可以貼相。相片上載前會喺你嘅瀏覽器縮細，同清走相入面嘅位置（GPS）等資料，之後公開顯示。每張相會交俾自動審查服務檢查有冇唔適當內容，檢查結果只有管理員睇到。請唔好影到其他人嘅樣、車牌、地址或者電話。
- 被隱藏嘅聯絡方法：如果你喺帖文或者回覆寫咗電話、email、LINE、WhatsApp 等，網站會喺公開頁面隱藏佢哋，但會記錄原本寫咗咩，只有管理員睇到，用嚟識別詐騙同處理舉報。
- 改帖記錄：每次改帖或者刪帖之前，網站會保存一份當時嘅帖文內容同邊個改，只有管理員睇到，用嚟處理騙案同交易爭議。
- 改帖密碼：只會以加密形式儲存，我哋都睇唔到原本密碼。
我哋唔會要求你提供真名、電話、地址或者簽證資料。
3. 點解收集同法律依據
| 用途 | 法律依據 |
|---|---|
| 顯示你嘅帖文、轉寄「聯絡發帖人」訊息 | 履行服務（你要求我哋提供嘅服務） |
| 防止詐騙、垃圾帖同濫用，例如封鎖重複發騙案帖嘅人、識別惡作劇刪除要求 | 正當利益（保護用戶同網站安全） |
| 處理舉報、刪除要求同爭議 | 正當利益 |
| 遵守英國法律要求 | 法律責任 |
我哋唔會將你嘅資料用嚟賣廣告，亦唔會賣俾任何人。
4. IP 地址點樣處理
- 記錄嘅係完整 IP 地址，只有管理員可以喺後台睇到，永遠唔會喺網站公開顯示。
- 用途只限於防止詐騙同濫用、處理舉報同刪除要求，同埋回應合法嘅法律要求。
- 一般情況下，IP 記錄會喺 90 日後自動刪除。
- 如果某個帳戶或者 IP 涉及詐騙、封鎖或者正在處理嘅爭議，相關記錄最長會保留 12 個月，處理完就刪除。
5. 儲存期限
| 資料 | 保留幾耐 |
|---|---|
| 帖文 | 直至過期或者你刪除，之後 30 日內徹底清除 |
| Email 地址 | 最後一次使用後 12 個月 |
| 聯絡發帖人訊息 | 唔儲存（轉寄完就冇，副本只喺雙方嘅 email 入面）；寄件 email 同 IP 記錄跟下面 IP 一樣 |
| 改帖記錄 | 90 日（帖文刪除咗都一樣）；涉及詐騙或者爭議最長 12 個月 |
| IP 地址同裝置資料 | 90 日；涉及詐騙或者爭議最長 12 個月 |
| 相片 | 同帖文一樣：帖文刪除後 30 日內徹底清除；你自己或者管理員刪相就即刻刪除 |
| 被隱藏嘅聯絡方法 | 90 日；涉及詐騙或者爭議最長 12 個月 |
| 刪除要求同舉報記錄 | 12 個月 |
6. 邊個會接觸到你嘅資料
- 港英板管理員：只限處理審批、舉報同刪除要求。
- 服務供應商：幫我哋運作網站嘅公司，只可以按我哋指示處理資料：［Cloudflare（網站寄存、數據庫、相片儲存、防機械人）、Resend（寄 email）、Sightengine（相片自動審查）］。部份供應商可能喺英國以外處理資料，我哋會用英國認可嘅保障措施，例如 UK International Data Transfer Agreement。
- 執法機構：只會喺英國法律有效要求下（例如法院命令）先會提供資料。我哋唔會主動向任何人或者任何地方嘅機構提供用戶資料。
7. 你嘅權利
你有權：查閱我哋持有你嘅資料；要求更正；要求刪除；反對或者限制我哋處理；要求將資料轉移。請 email info@hkerboard.com，我哋會喺一個月內回覆。如果你唔滿意，可以向 ICO 投訴：ico.org.uk。
8. Cookies
我哋只用網站運作必需嘅 cookies，例如保持登入同防機械人驗證。唔用廣告或者追蹤 cookies。
9. 年齡
港英板只供 13 歲或以上人士使用。
10. 政策更新
如果政策有重大改動，我哋會喺首頁「管理員公告」通知大家。